Дойдубут туһугар үтүө дьыалаларга сирдиэҕэ

Дойдубут туһугар үтүө дьыалаларга сирдиэҕэ

Улуу Кыайыы 77 сылын көрсө оскуола үөрэнээччилэригэр стройдаан хаамыыга уонна байыаннай ырыаҕа парад ыытылынна. Маны сэргэ Арассыыйа, Саха Республикатын судаарыстыбаннай былаахтарын улуус үөрэҕин тэрилтэлэригэр Саха Республикатын ыччат уонна дьиэ кэргэн политикатыгар министиэристибэтэ дойдуга патриотическэй иитиини өйөөн бэлэх ууннулар.
Сэрии сылларыгар Анаабыр улууһун дьоно таба иитэн, үрүҥ кырсаны бултаан, балыктаан сэрии толоонугар сылдьааччыларга күүс-көмө буолбуттара. Улууспутугар биир сэрии огдообото, түөрт тыыл бэтэрээнэ бааллар. Уоттаах сэрии бүтэригэр олук уурсубут ытык дьоҥҥо махтаналларын, сүгүрүйэллэрин биллэрэн үөрэнээччилэр стройдаан хаамтылар.

Дойдубут норуотун сомоҕолуур сырдык бырааһынньыкпытынан Ыам ыйын 9 күнэ – Кыайыы күнэ буоларын эдэр ыччаппытыгар уһуйабыт. Ол курдук, гимназистар Арассыыйа гимнин киэн туттан туран чуордук ыллаатылар.

Улуустааҕы гимназия дириэктэрэ Валентина Матвеева, ыалдьыттар СР Правительствотын уонна СР баһылыгын дьаһалтатын олохтоох салайыныы боппуруостарыгар департамент салайааччытын солбуйааччыта Владимир Птицын, СР үлэҕэ уонна социальнай сайдыыга миниистирин солбуйааччыта Афанасий Постников, Анаабыр улууһун баһылыгын эбээһинэһин б.к. толорооччу Иосиф Васильев, Анаабыр улууһун бочуоттаах олохтооҕо Сергей Протодьяконов, улуустааҕы үөрэх управлениетын начальнига Туйаара Гуляева үөрэнээччилэргэ төрөөбүт сирдэрин таптааһынтан ийэ дойдуга бэриниилээх буолуу олуга уурулларын, уоттаах сэрии сылларыгар бу курдук эрдэҕэс саастарыгар билиҥҥи тыыл бэтэрээннэрэ бэйэлэрин харыстаммакка, тоҥору-хатары аахсыбакка үлэлээбиттэрин аҕыннылар. Салалта аатыттан Россия, Саха Республикатын былаахтарын гимназияҕа бэлэхтээн, дойдубут туһугар үтүө дьыалаларга, бэриниилээх буолалларыгар ыччакка итэҕэйдилэр. Бу күннэргэ кылаастарынан бары кыһаллан хаамарга бэлэмнэммиттэрин, Арассыыйа гимнин, Саха сирин Өрөгөй ырыатын хас бэнидиэнньик аайы долгуйан, киэн туттан туран ыллыылларын гимназия 8-с кылааһын үөрэнээччитэ Давид Корнилов үөрэ кэпсээтэ. Хамандыырдар рапорт биэрэн кылаастарынан стройунан хааман күрэхтэстилэр.

Салгыы Сааскылаах орто оскуолатын саалатыгар быйыл оскуолатын бүтэрэр Станислав Сыромятников арыаллаан киллэрэр. Парады «Бойцы Арктики» байыаннай патриотическай кулууп салайааччыта, история учуутала Гаврил Пермяков хамаандалаатын кытта байыаннай таҥастаах үөрэнээччилэр ырыаларын ыллыы-ыллыы көнөтүк туттан дуоспуруннаахтык хаамтылар. Билиҥҥи кэмҥэ хаһааҥҥытааҕар да дойдуну таптыырга, идиэйэҕэ бэриниилээх буоларга, ытык иэс өйдөбүллэригэр үөрэтии – билиҥҥи орто саастаах
көлүөнэҕэ сүктэриллэр. Анаабырбыт эдэр ыччатын билиҥҥи сыала биир – кылаастарын үчүгэй, туйгун сыаналарынан түмүктээһин, оскуоланы бүтэрээччилэр БКЭ эрэллээхтик туттаран, талбыт идэлэригэр үөрэххэ киирэн төрөппүттэрин үөрдүү. Маннык сылтан сыл сайдан инникитин төрөөбүт дойдуларыгар туһалаах киһи буолалларыгар — ыра санаалара улахан.

 

 

Источник: https://xn--80aaaaae5flrcuak4i.xn--p1ai/article/55613

Пролистать наверх